Guggenmusik Pulswärmer Riggisberg

D Riggisberger Fasnacht – oder wieso gits e Gugge ds Riggisberg

Lang isch’s här......Me gloubt’s fasch nid, aber äs isch wahr – ds Riggisberg hei mir scho am 13. März 1976 ds erschte Mau offiziell Fasnacht gfyret. Das mit emene Maskebau, organisiert vom örtleche Samariterverein. 15 Jahr später – 1991 - isch de es Chinderumzügli derzue cho – quasi als Start zur hütige Fasnacht. Du gsehsch, liebi Bsuecherin, liebe Bsuecher ds Riggisberg het me scho vor Bärn (wieder) a d Fasnacht gloubt......

D Afäng vor Guggemusig.....Im 1992 hei sich de die erschte Musikante zäme da, für däm Fasnachtstribe chli schregi Tön bizmische. Am 23. Oktober 1994 hei sich du die Musikante zur erschte Prob troffe. Gspannt isch är gsy üse Guggemajor, dr Lüku Keusen. Wär chunnt ächt aues? Wo aber du dr „Riverside of Babylon“ dür ds Probelokau tönt het, isch dr Bann broche gsy u äs het ihn vor luter Fröid fasch verjagt!

E Name u es Kostüm müesse mir no ha....

Pure Zuefau
Unkonventionell entstande, dür e aktivi
Lehrchraft im Chindergarte. Statt
Singe hei sy Fasnachtsmaske baschtlet.
Wär söll jeze dr Chinderumzug begleite?
Ä hemds-Ärmligi Narregruppe het sich spontan ds
Riggisberg zämegfunde. Dr zäntume bekannt
Maskebau vo de Samariter isch ds erschte Mal mit
Erfolg musikalisch begleitet worde. U 1995, mit 30 Aktive, sy die
Riggisberger Narre ds erschte Mau mit ämene eigene Kostüm ufträte.

Ds Gründigsjahr vo de Pulswärmer....
1995Die erschti Riggisberger Fasnacht i dr Engelochhalle het underem Motto: „Riggisberg steit Chopf“ stattgfunde. Vom 17. – 19. Februar 1995 het’s ds erschte Mau im hütige Rahme gchüblet u gschränzt i de Gasse vo üsem Dorf. Sogar d Bösse vo Engeloch’s hei müesse fliehe vor üs – sy hätte ke Platz meh gha i dere Haue. So viu chlini u grosse Narre sy cho für mit üs ds fyre!

Es spitzigs u schlichts Hüetli het’s müesse sy!

I däm Jahr, sy mir den o ds erschte Mau uswärts gah schränze. Am 4. Februar hei mir üse erscht Uftritt gha. Dr Chinderfasnachtsumzug vo Schliern hei mir dörfe begleite! O uf Bärn hei mir dörfe. Schön u es riesigs Erläbnis isch’s gsy, vor Matte ufe Bundesplatz ds loufe. Dä erscht Umzug ds Bärn isch dr Start zur e Tradition gsy – syt denn ghört d Bärner Fasnacht jedes Jahr zu eim vo üsne Höhepünkt vor 5. Jahreszyt!

Die Erklärung Was ist eine Guggenmusik
Die Geschichte und Ausprägungen Mehr Infos dazu hier (Wikipedia)